తెలంగాణ రాష్ట్రంలో 117 మున్సిపాలిటీలు, 6 మున్సిపల్ కార్పొరేషన్ల పాలక మండళ్ల ఎన్నికలను ఫిబ్రవరి 14న నిర్వహించేందుకు ప్రభుత్వం సన్నాహాలు చేస్తున్నట్లు సమాచారం. ఎన్నికల షెడ్యూల్ ఈ నెల 17న ప్రకటించే అవకాశం ఉందని అధికారులు చెబుతున్నారు. ఎన్నికల ప్రక్రియను సజావుగా నిర్వహించేందుకు అన్ని ఏర్పాట్లు వేగంగా కొనసాగుతున్నాయి.

ఈ ఎన్నికల్లో BCలకు 32 శాతం రిజర్వేషన్లు కల్పించే దిశగా ప్రభుత్వం ఆలోచన చేస్తున్నట్లు తెలుస్తోంది. మొత్తం 2,996 వార్డుల్లో ఎన్నికలు జరగనున్నాయి. ఇప్పటికే ఓటర్ల జాబితా తుది దశకు చేరుకోగా, పోలింగ్ కేంద్రాల గుర్తింపు, సిబ్బంది నియామకంపై అధికారులు కసరత్తు చేస్తున్నారు.

ఎన్నికల నిర్వహణ కోసం సుమారు రూ.85 కోట్ల నిధులు విడుదల చేయాలని పురపాలక శాఖ ప్రభుత్వానికి లేఖ రాసినట్లు సమాచారం. భద్రతా ఏర్పాట్లు, ఈవీఎంలు/బ్యాలెట్ పేపర్ల సిద్ధం, ఎన్నికల సిబ్బందికి శిక్షణ వంటి అంశాలపై కూడా దృష్టి సారించారు. మున్సిపల్ ఎన్నికలతో రాష్ట్ర రాజకీయాల్లో మరోసారి వేడి పెరిగే అవకాశం ఉందని రాజకీయ వర్గాలు అభిప్రాయపడుతున్నాయి.