ibomma రవి కస్టడీ రిపోర్ట్స్‌ను పోలీసులు కోర్టుకు సమర్పించారు. రిపోర్ట్ ప్రకారం రవి రెండు రకాలుగా సినిమా ప్రింట్లు కొనేవాడు. నార్మల్ ప్రింట్‌కు 100 డాలర్లు, HD ప్రింట్‌కు 200 డాలర్లు చెల్లించేవాడని పోలీసులు పేర్కొన్నారు. అతని పేరుతో ఉన్న ఏడు బ్యాంక్ ఖాతాల్లో మొత్తం ₹13.40 కోట్ల లావాదేవీలు జరిగినట్లు గుర్తించారు. అదనంగా బెట్టింగ్, ఆన్‌లైన్ ప్రకటనల ద్వారా సుమారు ₹1.78 కోట్లు వచ్చినట్లు రిపోర్టులో ఉంది. తన సోదరి చంద్రికకు రవి సుమారు ₹90 లక్షలు పంపినట్లు కూడా దర్యాప్తులో బయటపడింది. రాకేశ్ అనే వ్యక్తి ద్వారా ట్రేడ్‌మార్క్ లైసెన్స్ పొందినట్టు చెప్పారు. వచ్చిన డబ్బుతో విలాస జీవనం గడిపినట్లు పోలీసులు పేర్కొన్నారు.

పోలీసుల సమాచారం ప్రకారం, ఈ వ్యవహారంలో మరికొన్ని వ్యక్తులు, విదేశీ సంబంధాలు ఉన్నాయా అనే కోణంలో కూడా దర్యాప్తు కొనసాగుతోంది. సినిమాలపై ఉన్న కాపీరైట్ హక్కులకు భంగం కలగజేసినందుకు సంబంధిత చట్టాల కింద కఠిన చర్యలు తీసుకుంటామని అధికారులు స్పష్టం చేస్తున్నారు. నిర్మాతలు, థియేటర్ యజమానులకు భారీ నష్టం జరిగిందని విచారణ అధికారులు తెలిపారు.

సినిమాలను చట్టబద్ధమైన ప్లాట్‌ఫామ్‌లలో మాత్రమే చూడాలని, పైరసీకి దారితీసే చర్యలు నేరమని ప్రజలకు కూడా జాగ్రత్త సూచించారు.