ఈ ఏడాది ప్రపంచవ్యాప్తంగా అత్యధిక వసూళ్లను ఒక యానిమేషన్ చిత్రం సాధించి రికార్డులు బద్దలుకొట్టింది. అది చైనాకు చెందిన చిత్రం కావడం ప్రత్యేక ఆకర్షణగా మారింది. జనవరిలో విడుదలైన ‘నే ఱూయా–2’ (Ne Zha-2) ప్రపంచ బాక్సాఫీసును షేక్ చేసింది. ఈ సినిమా ఇప్పటివరకు సుమారు రూ.19 వేల కోట్లకు పైగా కలెక్షన్లు సాధించి గ్లోబల్ టాప్ గ్రాసర్గా నిలిచింది.
చైనీస్ మైథాలజీ ఆధారంగా తెరకెక్కిన ఈ ఫాంటసీ–అడ్వెంచర్ మూవీలో గ్రాఫిక్స్, విజువల్ ఎఫెక్ట్స్, బ్యాక్గ్రౌండ్ స్కోర్ కీలకంగా పనిచేశాయి. మొదట మాండరిన్ (చైనా భాష)లో విడుదలైన ఈ సినిమాకు వచ్చిన స్పందన దృష్ట్యా తరువాత ఇంగ్లీష్, హిందీ సహా మరికొన్ని భాషల్లో డబ్ చేసి విడుదల చేశారు. అన్ని భాషల్లోనూ ఈ సినిమా మంచి ప్రేక్షకాదరణను సొంతం చేసుకుంది.
తల్లిదండ్రులు, సమాజం విధించిన బంధాలను ఎదిరించి, తన విధిని తానే రచించుకునే ఓ బాలుడి ప్రయాణమే ఈ కథలో చూపించారు. పిల్లలకు మాత్రమే కాదు, పెద్దలకు కూడా నచ్చేలా భావోద్వేగాలు, యాక్షన్, సందేశం మిళితంగా ఉండటం విజయం వెనక ప్రధాన కారణంగా చెప్పబడుతోంది.
విమర్శకుల ప్రశంసలు, ప్రేక్షకుల మౌత్టాక్ కలిసివచ్చి సినిమా దీర్ఘకాలం థియేటర్లలో హౌస్ఫుల్ షోలు నడిపింది. దీంతో హాలీవుడ్ లైవ్–యాక్షన్ పెద్ద చిత్రాలకే సాధ్యమని భావించిన రికార్డులను కూడా ఈ యానిమేషన్ మూవీ చెరిపేసింది.