తెలంగాణలో రాజకీయ వేడి మళ్లీ పెరుగుతోంది. మంత్రి పొంగులేటి శ్రీనివాస్ రెడ్డి బీఆర్‌ఎస్ వర్కింగ్ ప్రెసిడెంట్ కేటీఆర్పై తీవ్ర విమర్శలు చేశారు.
“తన ఇల్లు FTL పరిధిలో ఉందని నిరూపిస్తే నేనే కూల్చిస్తాను. లేకపోతే అప్పా జంక్షన్‌లో ముక్కు నేలకు రాస్తారా?” అంటూ ఆయన కేటీఆర్‌ను బహిరంగంగా సవాల్ చేశారు.
పొంగులేటి మాట్లాడుతూ –
“లక్ష డబుల్ బెడ్రూమ్ ఇళ్లు ఎవరికిచ్చారు చెప్పండి. కేవలం మాటలతో ప్రజలను మోసం చేయడం మానేయండి. 500 రోజుల్లో తిరిగి అధికారంలోకి వస్తామని చెప్పడం వెనుక ఉన్న బీఆర్‌ఎస్ కుట్ర ప్రజలకు స్పష్టంగా కనిపిస్తోంది,” అని అన్నారు.
అలాగే, ఆయన గులాబీ నేతలపై తీవ్రంగా విరుచుకుపడ్డారు.
“గులాబీ నేతల కుట్రలు, కుతంత్రాలు ప్రజల కళ్లముందే జరుగుతున్నాయి. ఇప్పుడు ప్రజలు మోసపోవడం లేదు. గత పదేళ్ల పాలనలో బీఆర్‌ఎస్ చేసిన అవినీతి, దోపిడీకి ప్రజలు సమాధానం చెబుతారు,” అని పొంగులేటి హెచ్చరించారు.
పొంగులేటి వ్యాఖ్యలు ప్రస్తుతం తెలంగాణ రాజకీయాల్లో పెద్ద చర్చకు దారి తీస్తున్నాయి. కేటీఆర్ ఈ సవాల్‌కి ఎలా స్పందిస్తారో అన్న ఆసక్తి పెరిగింది.